Yangiliklar
O‘zbekiston harbiylari Pokistonda o‘tkazilgan xalqaro armiya o‘yinlarida g‘alaba qozondi.
Musobaqalarda 15 mamlakatdan 31 ta jamoa ishtirok etdi. O‘zbekiston harbiylarining raqiblari AQSh, Xitoy, Turkiya, Saudiya Arabistoni, Belarus, Bahrayn, Iordaniya, Iroq, Maldiv orollari, Shri-Lanka, Marokash, Qozog‘iston, Qatar va Pokiston jamoalari bo‘ldi.
Dastur haqiqiy jang sharoitiga maksimal darajada yaqinlashtirilgan bo‘lib, 90 km masofani 60 soat ichida bosib o‘tishni talab qildi. Har bir bosqichda ishtirokchilar harbiy tayyorgarlikning turli yo‘nalishlari bo‘yicha ko‘nikmalarini namoyish etdilar: taktika, otish, injeneriya, aloqa, tibbiy yordam ko‘rsatish, ommaviy qirg‘in qurollaridan himoya, harbiy topografiya va kutilmagan test topshiriqlarini bajarish.
O‘zbekiston jamoasi barcha bosqichlarni ishonch bilan yakunlab, finishga birinchi bo‘lib yetib keldi. Bu uchun ularga 46 soat 44 daqiqa kerak bo‘ldi. Bir topshiriqda razvedkachilar musobaqa rekordi o‘rnatdilar: 90 kg og‘irlikdagi “jarohatlangan”ni to‘liq jihozda 5 km masofaga 34 daqiqa 15 soniyada evakuatsiya qildilar.
Yakuniy natijalarga ko‘ra, birinchi o‘rin O‘zbekistonga (95%) nasib etdi, ikkinchi o‘rin – Xitoy (74%), uchinchi – Bahrayn (65%).
Bu Team Spirit musobaqasida o‘zbek jamoasining beshinchi g‘alabasi hisoblanadi.
Eslatib o‘tamiz, mart oyida ham o‘zbek harbiylari AQShda o‘tkazilgan “Eng yaxshi jangchi” musobaqasida g‘alaba qozonib, yangi rekordlar o‘rnatgan edi.
Manba
