Yangiliklar
Toshkentda piyodalar o‘tish joylari xavfsizligi uchun yangi tizim sinovdan o‘tkazilmoqda.
Mirzo Ulug‘bek tumanidagi Osiyo ko‘chasida RRFB texnologiyasi — yuqori intensivlikdagi mayoqlar — yangi turdagi faol belgilar bilan birgalikda sinov rejimida joriy etildi, deb xabar beradi Yo‘l harakatini tashkil etish markazi matbuot xizmati.
Qayd etilishicha, tizim haydovchi piyodalar o‘tish joyini istalgan qatordan va harakatning istalgan yo‘nalishidan ko‘ra oladigan tarzda loyihalashtirilgan. Majmua harakat intensivligi past va o‘rtacha bo‘lgan ko‘chalar uchun mo‘ljallangan.
“Signal mayoqlari yo‘l chetlarida, ko‘chaning markazida hamda qatnov qismi ustidagi baland to‘sinda — magistral svetoforlarni o‘rnatish tamoyili asosida joylashtirilgan. Yo‘lning ikki tomoniga chaqiruv tugmalari o‘rnatilgan tayanch ustunlar qo‘yilgan. Tugma bosilgach, ustunlarning yuqori qismidagi yorqin sariq signal chiroqlari darhol yonadi”, — deyiladi xabarda.
“Piyodalar o‘tish joyi” belgisi yorug‘likli quti shaklida tayyorlangan bo‘lib, bu o‘tish joyining uzoqdan, ayniqsa qorong‘i vaqtda yaxshi ko‘rinishini ta’minlaydi.
Ta’kidlanishicha, AQSh Federal avtomobil yo‘llari boshqarmasi (FHWA) tomonidan o‘tkazilgan keng ko‘lamli tadqiqotlarga ko‘ra, RRFB haydovchilarning xatti-harakatini butunlay o‘zgartirishi mumkin.
Xususan, statistika shuni ko‘rsatadiki, odatiy “zebra”larda haydovchilar piyodalarga o‘rtacha faqat 18–30 foiz holatlarda yo‘l beradi. RRFB mayoqlari o‘rnatilgach, bu ko‘rsatkich 98 foizgacha ko‘tarilishi mumkin, chunki haydovchilar deyarli 100 foiz holatda tormoz bosadi.
Bundan tashqari, tizim haydovchiga 4 baravar tezroq reaksiya bildirish imkonini beradi: haydovchi stroboskop chaqnashini payqab, “zebra”ga yetib kelishidan ancha oldin tezlikni sekin pasaytira boshlaydi.
“Bu O‘zbekiston yo‘l infratuzilmasida RRFB yondashuvini pilot tartibda joriy etish bo‘yicha ilk loyihalardan biridir. Toshkentda ushbu texnologiya sinov rejimida qo‘llanilmoqda va piyodalar xavfsizligini oshirishdagi amaliy samaradorligini baholash imkonini beradi”, — deya xulosa qildi YHTM.
Manba
